ஒரு முறை நிகழும் மாயாஜாலம்-67

'டாம் அண்ட் ஜெர்ரி'

மனித மூளையின் உச்சக்கட்ட கண்டுபிடிப்பு 'கார்ட்டூன்' என்பேன். உங்களை மகிழ்வி(க்கும்)த்த கார்ட்டூன் தொடர் அல்லது திரைப்படங்களைப் பின்னூட்டத்தில் தெரிவியுங்கள்.

சிங்கம் தலையை நீட்டிக் கர்ஜித்துக்கொண்டு வெளிவர 'எம்ஜிஎம் கார்ட்டூன்' என்று தொடங்கும் 'டாம் அண்ட் ஜெர்ரி' எனக்குப் பிடித்த கார்ட்டூன் தொடர். கார்ட்டூன் நெட்ஒர்க் தொலைக்காட்சியில் பிரதானமாக ஒளிபரப்பாகும் 'டாம் அண்ட் ஜெர்ரி' கார்ட்டூன் தொடர் இடைவேளை இல்லாமல் தொடர்ந்து வந்துகொண்டே இருக்கும். நானும் என் குழந்தைகளோடு பார்க்க ஆரம்பித்து இப்போது வரை தொடருகிறது. 'டாம் அண்ட் ஜெர்ரி' நிகழ்ச்சி, பார்க்க உட்கார்ந்தால் இருக்கின்ற வேலை எல்லாம் அப்படியே நின்று விடும். 'டாம் அண்ட் ஜெர்ரி' மூவியை விட குறுந்தொடர்கள் எனக்குப் பிடிக்கும்.

1940-ஆம் ஆண்டு வில்லியம் ஹன்னா மற்றும் ஜோசப் பார்பெரா, இவர்கள் இருவரும் சேர்ந்து 114   'டாம் அண்ட் ஜெர்ரி' குறும்படங்களை உருவாக்கினார்கள். பிறகு இவர்கள் வழி வந்தவர்கள் 'டாம்', 'ஜெர்ரி' என்ற இரண்டு கதாபாத்திரங்களைக் கொண்டு ஸ்பைக், ஸ்டைக், நிப்பல்ஸ், புட்ச், டூடலஸ் போன்ற புதிய கதாபாத்திரங்களைப் புகுத்தி ஏராளமான குறும்பட சித்திரங்களை உருவாக்கினார்கள்.  காலங்கள் மாறினாலும், பல கடும் விமர்சனங்களை சந்தித்தாலும்  பார்வையாளர்களை மகிழ்விக்கத் தவறியதில்லை.  

'டாம் அண்ட் ஜெர்ரி' தொடருக்கு முக்கிய பலமே ஸ்காட் ப்ராட்லீ-யின் இசை. வசனகங்லற்ற காட்சியை பாப், ஜாஸ், மற்றும் கிளாசிக் வகை இசையைக்கொண்டு சிறப்பாக நிரப்பியிருப்பார். 'டாம் அண்ட் ஜெர்ரி' வகை வகையாக அடித்துக்கொண்டாலும், ரத்தம் தெறிக்கும் விதமாக இருக்காது. கடைசியில் ஒன்று சேருவது போலத் தான் தொடர் முடியும்,

'டாம் அண்ட் ஜெர்ரி' தொடரில் எனக்குப் பிடித்த இன்னொரு கதாபாத்திரம் 'ஸ்பைக்' என்ற வலிமையான அப்பாவி நாய் கதாபாத்திரம். சமயத்தில் டாமிடம் அடிவாங்கவும் செய்யும்.

1949-லேயே மேற்கத்தியப் பார்வையாளர்களுக்குச் சுவர்க்கம், நரகம் என்ற விஷயத்தை சொன்ன  'டாம் கோயிங் டு ஹெவன்லி பஸ்'  என்ற தொடர் எனக்குப் பிடித்த டாம் அண்ட் ஜெர்ரி தொடர்களில் ஒன்று.

நாமும் சில சமயங்களில் டாமாகவும், ஜெர்ரியாகவும் இருந்திருக்கிறோம், அதனால் தான் என்னவோ பெரியவர்களும் அதை ரசிக்கிறார்கள்.

சரி வாழ்க்கையில் நீங்கள் யார் டாமா?, ஜெர்ரியா ? அல்லது ஸ்பைக்கா ?

நன்றி: Youtube


குறிப்பு: இது என்னுடைய அறிவுக்கு எட்டிய, என்னுடைய அனுபவம் மட்டுமே.



- காளிகபாலி